Skip to content

மழை

நீர் கோர்த்த ஈரக் கோணிகள்
தசை துடிக்க பாதி நனைந்த
மாடுகள்
குண்டு பல்புக்குள் தேங்கிய நீர்
இன்னும் நிறம் பிரகாசமான
காய்கறிகள்
நீரில் மிதக்கும் அரைவட்ட
வெங்காயச் சருகுப் படகுகள்
தகர ஷெட்டில் தாளமாய்
சப்தம்
முழுதும் நனைந்த பரஸ்பர
ஈரச் சிரிப்புகள்
நேரம் கடந்தாலும்,
சட்டை நனைந்தாலும்
மேலும் மின்னினாலும்
மயங்கி வேடிக்கை பார்த்து
மாளாது
மார்க்கெட் மழை !

எனக்கு

வானம் தெரியாதெனக்கு
குளமும், ஏரியும் தெரியாதெனக்கு
மரமும், குளிர் மழையும்
தெரியாதெனக்கு
மழையும், கனிய ஆரம்பிக்கும்
பழமும் தெரியாதெனக்கு
அடுக்கி வைத்த
ஃபைல் அட்டைகளை
கலைக்கும் வேலை செய்து
முதல் வார
சம்பள நெல்லுக்கு
வாழும் எனக்கு
சிறகுண்டு,
இருந்தும்
பறக்கத் தெரியாதெனக்கு

அப்பா

கலைந்த தலையும்,
சரிந்த மூக்குக்கண்ணாடியும்,
சற்றே பெரிய
என் சட்டையின்
முற்பகல் வெயில்
நிழலில்
கண நேரம் வந்து
போனார்
இறந்த அப்பா

 

வியர்வை

பின்வாசல் வெளியே
சாப்பிட்டு முடித்து
கழுவ வைத்திருந்த
பாத்திரங்கள் மேல்
பெய்த மழையால்
சோற்றுப்பருக்கைளும்
கறிவேப்பிலைகளும்
மிதந்து களிக்க
எவர்சில்வர் தட்டின்
மேலெங்கும்
குளிர் வியர்வை
%d bloggers like this: