நல்முத்துப் பஞ்சணைமேல் நீயிருக்கும் வேளையிலே.. [ நீ எங்க தனியா இருந்தே.. ] நல்முத்துப் பஞ்சணைமேல் நாதனுடன் நீயிருக்கும் வேளையிலே நின் சொல்முத்துச் சொற்களால் எந்தன் குறை தீர்க்கச் சொன்னால் உன் வாய்முத்துச் சிந்திடுமா.. வாழ்வளிக்கும்.. அம்பிகையே ! - தருமி , திருவிளையாடல்
ஊர்ல
மெட்ராஸ் வண்டி போனால்
காலையில் ஆறு
வி.எம். போனால்
ஒன்பது
அன்னை சத்யா போனால்
பத்து
தாதா பஸ் போனால்
பன்னிரெண்டு
மீன் வண்டி வந்தால்
நாலேகால்
சுந்தர விநாயகர் வந்தால்
அஞ்சரை
சங்கு புடிச்சா
ராத்திரி ஒன்பது
இங்க எப்பொழுதுமே
நைட் ஷிஃப்ட்டு
பகல்
நேரமே தெரிவதில்லை.
மல்லாட்டை
மொள்ள
ஜோடுதல
அந்தாண்ட
அப்பறமேட்டிக்கா
எரவாணம்
கரசவாத்து
பாவாடராயன்
தவளடை
சிங்கினாதம்
செம்மொழி தானெனினும்
எம்மொழியை
மனைவிக்கு
புரிய வைக்க
அவகாசம் வே(வோ)ணும்.
கல்லுப்பு,
பழைய புளி,
ஐ.ஆர்.8,
கல்கண்டு,
உ.கடலை,
வெல்லத்துணுக்கு
எதையும்
மெல்ல முடிவதில்லை
சூப்பர் மார்க்கெட்டில்.
உட்கார்ந்து குடிக்க டீக்கடையோ
நடக்கும் தூரத்தில் தியேட்டரோ
இடைவேளை இல்லாத நூலகமோ
ஆளில்லாத கோயிலோ,
பூங்காவோ
வேண்டும் பேட்டைக்கொன்று
வீட்டில் இருக்க முடியாத
நேரங்களில்.