நல்முத்துப் பஞ்சணைமேல் நீயிருக்கும் வேளையிலே.. [ நீ எங்க தனியா இருந்தே.. ] நல்முத்துப் பஞ்சணைமேல் நாதனுடன் நீயிருக்கும் வேளையிலே நின் சொல்முத்துச் சொற்களால் எந்தன் குறை தீர்க்கச் சொன்னால் உன் வாய்முத்துச் சிந்திடுமா.. வாழ்வளிக்கும்.. அம்பிகையே ! - தருமி , திருவிளையாடல்
மழை பெய்த நாளில்
ரயில் பாதையருகே
சிவப்பு சட்டையில் ஒரு
சிறுவனைப் பார்த்தேன்..
ஏழாம் வகுப்பு தமிழ்ப் பாடத்தில்
கொட்டும் மழையில்
சிவப்பு சட்டை காட்டி
ஓடும் ரயிலைக் காப்பாற்றிய
வளவனாக இருக்குமோயென
யோசித்தேன்..
இருக்காது..அவன் இந்நேரம்
வளர்ந்து வேலைக்குப்
போயிருப்பான் என்று
சிரித்துக்கொண்டேன்
தொழுத கையுள்ளும் படை ஒடுங்கும்
ரிசஷன் கலவரத்தில் போனஸ் ஒடுங்கும்
திருத்தப்பட்ட மீட்டரில் சூடு ஒடுங்கும்
காயும் வெய்யிலில் கானல் ஒடுங்கும்
சலூன்கடை சிரிப்பில் அரசியல் ஒடுங்கும்
அழுத கண்ணீரில் அவமானம் ஒடுங்கும்
கவலைகள் ஒடுங்கும்
என் குழந்தையின் சிரிப்பில்.
வீட்டுப் பாடத் தொல்லையில்லாமல்
கோடை விடுமுறையிலிருந்த
குழந்தைகள் அலையில்
குதித்துக்கொண்டிருந்தன..
குடும்பஸ்தர்கள்
மக்கிய மற்றும் மக்காத
கவலைகளை
கடலில் கொட்டிக்கொண்டிருந்தனர்..
ஜோடியாக வந்த பெண்
காதலிப்பதைக் காட்டிலும்
காதலிக்கப்படுவதை பெருமையாக
காட்டிக்கொண்டு நடந்தாள்..
எதையும் கவனிக்காமலேயே
அலைகள்
திரும்ப திரும்ப
வந்துகொண்டிருந்தன..
திங்கள்கிழமைகளைப் போல்.
குட்டையான உருவமும்
உள்பக்கம் கட்டிய வாட்சும்
எரிக்கும் பார்வையும்
சவுக்கு குச்சியுமாக
வெளுத்து வாங்கிய
அலமேலு டீச்சர்
தளர்வாகவும்
தனியாகவும் போனபோது
நலம் விசாரித்தேன்
ஓய்வுக்குப் பிறகு
தனக்கு வந்த
நலக் குறைவு
பலரின் சாபமாகயிருக்கலாம்
என்றார்
பள்ளிக்கூடத்துல
பொம்பளப்பிள்ளைகளை
கண்டிச்சுப் பாதுகாப்பா
பாத்துகிட்டேன் ; அது
தப்பா என்று கேட்டார்
பதில் தெரியாததால்
வேறு தெருவில்
தனியே வசிக்கும்
ஒரே மகனின் குடும்பம்
பற்றிக் கேட்டு
பேச்சை மாற்றினேன்.