நல்முத்துப் பஞ்சணைமேல் நீயிருக்கும் வேளையிலே.. [ நீ எங்க தனியா இருந்தே.. ] நல்முத்துப் பஞ்சணைமேல் நாதனுடன் நீயிருக்கும் வேளையிலே நின் சொல்முத்துச் சொற்களால் எந்தன் குறை தீர்க்கச் சொன்னால் உன் வாய்முத்துச் சிந்திடுமா.. வாழ்வளிக்கும்.. அம்பிகையே ! - தருமி , திருவிளையாடல்
வாசலில் நின்றால்
அதிக நேரம் டிவி பார்த்தால்
டியுஷனில்ருந்து வர லேட்டானால்
எதிர்த்துப் பேச முயன்றால்
சத்தமாக சிரித்தால்
பொட்டு வைக்காமலிருந்தால்
என
எதற்கெடுத்தாலும்
எரிந்து விழுந்த அப்பா
உலகம் தெரியாம அதை
வளர்த்துட்டேனே என்று
மண்டபத்தில்
தேம்பியழுத போது
வராத அழுகை
புதுக்குடித்தனத்தில்
தனியான வீட்டில்
அப்பாவை நினைத்ததும்
அருவியாக
வந்தது.
கோயில் மண்டபத்தில்
காலை 7 மணி வெய்யில்
சாய்வாக விழுந்ததைப் போல
மெழுகிய இளம்பச்சை
பசுஞ்சாணத்தில்
வெள்ளை மாவுக்கோலம்
போல
மழை முடிந்து நனைந்திருந்த
பன்னீர் மல்லியைப் போல
கருநீலத் தாவணியில்
மகாலஷ்மி டாலரைப் போல
பளிச்செனப் பதிந்தாய்
முதல்நாள் பார்வையில்.
புள்ளி வைத்து கம்பிக்கோலம்
போடுவதை போல
பாடம் படித்தபடி நெருக்கமாக
மல்லிப்பூ கட்டுவதைப்போல
நெயில்பாலிஷ் வைத்து
ஊதிவிடுவதைப் போல
கண்ணாடியில் பார்க்காமலே
கம்மல் மாற்றுவதைப் போல
நெற்றிப் பொட்டை கண்ணாடியில்
ஒட்டுவதைபோல
விரலில் அதிகமான
மையை முடியில்
தடவுவது போல
எவ்வளவு இயல்பாக சொன்னாய்
உனக்கு திருமணம்
நிச்சயிக்கப்பட்டு விட்டதை.
குழந்தைக்காக காந்தம்
வாங்க அலைந்தபோது
மினா ரிக்கார்டிங் கடையில்
பழைய ஸ்பீக்கரில்
காந்தம் கிடைத்தது
குழந்தைக்காகவென தெரிந்ததும்
காசு மறுக்கப்பட்டது
மண்ணுல பெரட்டிட்டு
பேப்பர்ல வச்சு பேய்
காட்டுங்க ஸார் என
ஆர்வமாக சொன்ன போது
அவரின் கண்களில்
தாடி, மீசை மறைந்து
சில்க் ஹவுஸ் கைப்பையோடு
6 ஆ பிரிவு மாணவன்
தற்காலிகமாக வந்து..
மறைந்து போனான்.