Skip to content

Date archive for: March 2015

ஒளிரும் விளக்கு

“அப்றம்.. வேறென்னங்க ?”
எனக் கேட்டு
முடிக்கத் தெரியாத‌
என் உரையாடல்கள்

“வாழ்க்கைங்கறது..”
என அடுத்தவர்
கஷ்டத்திற்கு நான்
சொல்லும் ஆறுதல்கள்

“எனகென்னன்னா..”
எனத் தொடங்கும்
என் கொள்கை
விளக்கங்கள்

எதனோடும் ஒட்டாமல்
அபத்தமாகவே தெரியும்

நண்பகலிலும் ஒளிரும்
சோடியம் விளக்கு
போலவே !

என்ன சொல்லி விழுகிறது மழைத்துளி – 2

புதிதாய் பிறந்த குழந்தை போல்,
காற்றுக்கும் மேகத்துக்கும்
எண்ணமில்லாமலும்.
வண்ணமில்லாமலும்
பிறந்தவன் நான்

விழுவதும் எழுவதும்
என்னியல்பு

தாமரையிலை என்னைச் சேர்க்காது
இருந்தாலும் விழுவேன்

செம்மண் என்னைப் பழுப்பாக்கும்
இருந்தாலும் விழுவேன்

கடல் என்னை உப்பாக்கும்
இருந்தாலும் விழுவேன்

மீண்டும் மீண்டும் மேகமாய் எழுவேன்
மழையாய் விழுவேன் – 

பம்புசெட்டு அறையின் மேலிருந்து
கிணற்றில் விழும்
சலிக்காத சிறுவன்
போலவே  !

என்ன சொல்லி விழுகிறது மழைத்துளி

அடர்ந்த காட்டில்,
ஆளில்லாத சாலையில்,
எரியும் தெருவிளக்கில்,
ஏரிக்கரையில்,
பிரசவ மருத்துவமனையில்,
சுடுகாட்டில்,
கோபுரத்தில்,
சிலுவையில்,
பூவின் மேல்,
பொங்கும் கடலின் மேல்,
விழுந்ததற்கு

அழுததில்லை
நான்

மெளலிவாக்கத்தில்
சில உயிர்களின் மேல்
விழுந்து கிடந்த கட்டிடத்தின்
கான்கிரீட்டைக்
கரைக்க முடியாமல்

அழுதேன்
இரண்டு நாளாய்

எப்படி

வாலாட்டி வந்த நாயிடம்,
கையைப் பிடித்த பெற்றவரிடம்,
விசும்பும் மனைவியிடம்,
காலைக் கட்டிய குழந்தையிடம்,
ரயில் நிலைய‌
ப்ளாட்பாரத்தில்
அணைத்த நண்பனிடம்
சொல்லிவிட்டு 
வண்டியேறினேன்.

திரும்ப வர நாளாகும்
என்பதை 
எப்படிச் சொல்வேன்
ஜன்னலில் துரத்தி
கூடவே வரும் 

என் சொந்த ஊர்

நிலவிடம்.

%d bloggers like this: