Skip to content

Date archive for: March 2015

வீடுடைய நான்

தும்பி போல
லேசாக, துடிப்பாக‌
பறந்து கொண்டிருந்தேன்,
வாடகை வீட்டு
காலங்களில்..

ஆசைப்பட்டு இடம் வாங்கி
கடன்பட்டு அதில் வீடும் கட்டி
மாதத் தவணையில் 
மொத்த கவனமும் குவிந்து
மெதுவாக.
ஊர்ந்துகொண்டிருக்கும் போது
புரிந்தது

தன் வீட்டைத் தானே
சுமக்கும்
நத்தையின்
நகர்தலைப் பற்றி !

தாய் மேல் ஆணை

மத்திய வயது
பெண்கள் இருவர்
இறகுப்பந்து ஆடிக்கொண்டிருந்தனர்,
பூங்காவில்..

“பந்து வெள்ள தான்
விழுந்துது.. நான் பாத்தேன்.
காட் ப்ராமிஸ், மதர் ப்ராமிஸ்”
அழுவது போலவே சொன்னார்
 அதில் ஒருவர்.

அடர் பச்சை யுனிஃபார்ம் பாவாடையும்,
பஃப் வைத்த மேல் சட்டையும்,
மடித்து கட்டிய 
ரெட்டை ஜடையும்,
வெள்ளை ரிப்பனுமாக‌
ஒரு சிறுமி தான் அங்கு
தெரிந்தாள்

பையில்
ஜியாமெட்ரி பாக்ஸும்,
நெல்லிக்காயும்
வைத்திருப்பாளோ
என்னவோ !

இந்திரன் வந்ததும்

“முந்தானை முடிச்சு” பார்த்து
முன்கூட்டியே எல்லாரிடமும்
சொல்லிவிட்டு சினிமாவுக்குப் போவதை
நிறுத்தினேன்

“விக்ரம்” பார்த்து
கழுத்தின் பக்கவாட்டில்
முத்தம் தருவது
சிறந்ததென்று
தெளிந்தேன்

“ஊமை விழிகள்” பார்த்து
காதலியோடு
விஜிபி கடற்கரைக்குப் போனால்
இருட்டுவதற்கு முன்னரே
பஸ் பிடிப்பதென்று
தீர்மானித்தேன்

தீதும் 
நன்றும்
திரை
தர வாரா !

ஐஸ்

பால் நிறத்தில்
ஆரஞ்சு நிறத்தில்
பச்சை, சிவப்பு நிறத்தில்
இப்படி


எந்த நிறத்தில் கேட்டாலும்

‘ஐஸ்’ குமார் அண்ணன்
“பெட்டி ! தம்பி சொல்ற கலர்
குடு” என்று கை விட்டு
ஐஸ் எடுத்து தருவார்,
சைக்கிளின் பின்னே
வைத்த அதிசய
சதுரப் பெட்டியிலிருந்து


“வண்டியைப் பாத்துக்கடா”
என்று ஒப்படைத்த ஓர் நாளில்
ஆசையாக பெட்டியில்
எட்டிப் பார்த்தேன்
அதில்


வெட்டிய வானவில்
துண்டங்கள் கிடந்தன,
உறைந்து.
%d bloggers like this: