Skip to content

Date archive for: June 2015

பஜார் வாசனை

உரமூட்டை,
குவித்து வைத்த
மஞ்சள், குங்குமம்,
டீக்கடை பால் ஆவி,
புகையிலை நெடி,
மஞ்சள் வாழைத்தார்கள்,
குவித்து வைத்த
சம்பங்கியும், சாமந்தியும்,
ஸ்டார் ஷூ மார்ட் தோல்
வாசனை,
ஸ்ரீதர் கஃபேயில்
போட்ட சாம்பிராணி
வெத்தலைக் கூடை,
தனியா அரைக்கும்
மாவு மெஷின்,
பெட்ரோமாக்ஸ் தள்ளுவண்டி
வேர்க்கடலை
இவை கலந்த
மணத்திற்கு
பஜார் வாசனை
என்று பெயா்.

தொட்டி மீன்

வளர்ப்பு மீன்களிடம்
பிரியம் அவளுக்கு
அவரும்,
பிள்ளைகளும் வெளியே
போன பின்னே

கண்ணாடித் தொட்டியில்,
நீர் மாற்றி,
துகள்கள் கொட்டி,
பெயரிட்ட மீன்களோடு
இரு கன்னத்தின்
உள்பக்கம் கடித்து
உதடு குவித்து
அவை போலவே
செய்து சிரித்து
பண்பலை பாட்டுக்கு
தலையாட்டி, துணி காய
வைக்கப் போனாள்

தானும் நீரில்லாத,
ஜன்னல் வைத்த
ஒரு கான்கிரீட் தொட்டியில்
இருப்பது தெரியாமல்.

என் பிம்பங்கள்

வெள்ளைத்துண்டு, படிகாரம்,
மெதுவாய் சுற்றும் ஃபேன்,
ராமர் கலர் சீட்டுடன்
சுழலும் நாற்காலி,
பிரம்புக்கூடையில் முடி,
பட்டை தீட்டும் பெல்ட்,
“ஓ” போல தண்ணீர் ஸ்பிரே,
காலுக்கடியில் செங்கல்
வைத்த மர பென்ச்,
கலைந்த தினசரிகள்,
ஒயின்ஷாப் கவர்ச்சிப்படம்
இவை ஏதுமில்லாத..

நிறைய லைட்டுகள்
வெள்ளை வெளிச்சம்
கொண்ட ஏசி சலூன் கடையில்
சின்ன மகனின் தலையை
சாய்த்து பிடித்தபடி நான்
எனக்குப் பின்னே
கண்ணாடிக்குள் கண்ணாடிகள்
அதில்

என்னைப் பிடித்தபடி அப்பா
அவரைப் படித்தபடி தாத்தா என
தலைமுறை பிம்பங்கள்.

 

வரப்பில் சாய்ந்த நெல்

நெல்மணிகள் கூடி
செழித்து தலை சிலுப்பி
வரப்பின் புல் மேல் சாய்ந்து
ஊர் வேடிக்கை பார்க்க
பெருமையாக
காற்றில் அசைந்தாடியது
முற்றிக் காய்ந்த
நெல் கதிர்கள்

வளர்த்து உதவிய
பம்புசெட்டுக்
கிணற்று நீரோ
பாறைகளுக்குக் கீழே
ஆழத்தில்
சலனமில்லாமல்
வானத்தின் நீலம்
பார்த்தபடி

%d bloggers like this: