Skip to content

Date archive for: August 2015

நகர்வது

மெஷினோ, மேற்படிப்போ,அதிகாரியோ,
அறுவை சிகிச்சை செய்பவரோ
நகர நெருக்கடியிலிருந்து
தப்பித்து பயணிக்கும்
ஒருவனும்
வெள்ளரியோ, வேர்க்கடலையோ,
சாயநூலில் கட்டிய மல்லியோ,
நாகப்பழமோ, எதையோ
வியாபாரம் செய்து
நகரத்துக்கு போய்விடுவதில்
தீர்க்காமாய் இருக்கும்
ஒருவனும்
ரெயில்வே கேட்டருகே
காத்திருக்கும்போது
பரஸ்பரம் கடந்து கொண்டனர்..
எதிரே, வரி வரியான மஞ்சள்
உடம்புடன் கீழே
விழும் பூவரசம்பூக்கள்
பார்த்தபடி எங்கும்
நகரப் பிடிக்காமல்
ஒரு சிறு கோவில்
தெய்வம்.

பயணிக்காத வார்த்தைகள்

காற்றின் களிப்பில்
காடா விளக்கொளி அசைந்திருக்க
போர்வையும் புடவையும்
ஏலம் போடுபவர் போல
சலிக்காமல்
எடுத்துப் போடுகிறேன்
என் வார்த்தைகளை
ஏதோ காரணங்களுக்காக
சில வார்த்தைகள் கோர்வையாகிச்
சேர்ந்து பார்வையாளனோடு
கிளம்பி விடுகின்றன
சேராத வார்த்தைகளை
முன்பு போல
அடுக்கி வைத்துவிடுகிறேன்
மற்றொரு இடத்தில்
மற்றொரு விளக்கெரியும்
பொழுதுக்காக.

 

மழைப்பாடல்

மழை பெய்யாத பேட்டைக்கு
மழை பெய்த
பேட்டையிலிருந்து
அழுக்கெல்லாம் தொலைத்து
நீர்த்திவலைகள் தெறித்து
படிக்கட்டில் நீர் வழிந்து
சாலையில் தண்ணீர் தடம்
பதித்தபடி வந்த பேருந்தை
எல்லோரும் வேடிக்கை
பார்த்திருந்தனர்
மழைப்பாடல் முடிந்து
நனைந்த நடிகை
புடவையின் ஃபால்சில்
நீர் சொட்ட, டவல் போர்த்தி
அவள் அறைக்கு சென்றதைக்
கூடி நின்று
பார்த்தது போலவே.

 

அலங்காரம்

ஒரு மேகமூட்ட நாளின்
மாலையில் நடந்த
வரவேற்பில்
பூச்சரங்களால் தேகம்
மறைத்து
மருதாணி போல் கோலம்
வைத்து
இதயம் படம் வரைந்து – அதில்
அம்பு துளைத்து
ஒரு பக்கம் பூங்கொத்து
வைத்து
சற்று அதிகப்படியான
வெட்கச் சிரிப்புடன்
தெரிந்தது
அந்த வெள்ளை நிற
வெளிநாட்டுக் கார்.
%d bloggers like this: