Skip to content

Date archive for: August 2015

தந்தை

மழையில்,
ஒரு குடையில்,
தூக்கிச் செல்லப்படும்
மகன்களால்
குடைக்கு வெளியே
தந்தையின்
நகர்ந்து நனையும்
சட்டைப்பகுதியின்
ஈரம் உணரப்படுவதில்லை

 

இன்று வெள்ளிக்கிழமை..

குளிர்ந்த கல் தரையும்
கொடி மரமும்
துவாரபாலகரும்
சர விளக்கும்
கோபுரத்தில் வண்ணமயமாக
வாழும் அனைவரும்
நவக்கிரகங்களும் கூட
 ஒரே திசையில் ஆர்வமாய்
வாசல் பார்த்திருந்தனர்,
கருநீலத் தாவணி
பிரளும் பாவாடையில்
பூக்கூடையுடன் வரும்
உன்னைப் பார்க்கலாம்
என்று ரகசியமாய்
சிரித்தபடி

 

முன்பு பார்த்த பெண்

பச்சை விரிப்பும்
வெள்ளைக் கட்டிலும்
துணிகள் காயும்
சிறுங்கட்ட ஜன்னலும்
பெனாயில் வாடையும்
நைட்டியும் ஒற்றை மஞ்சள்கயிறும்
ரப்பர் செருப்பும்,
பெரிய வயிறு பெண்களும்
வலயும் சத்தமும் கொண்ட
அரசாங்க ஆஸ்பத்திரி
பிரசவ வார்டின்
வெளிப்புறத்தில் காய்ந்த
வெடிப்புகள் நிறைந்த
வேப்பமரத்தடியில் சிறிது
நேரம் இருக்க
நேரிடும் ஒரு ஆணால்
பின்னொரு முறை
பார்க்க முடியாது
எந்தப் பெண்ணையும்
முன்பு பார்த்த
பெண்ணைப் போலவே

சிறிது செவிக்கு

தினக்கூலி கிடைத்து
சிகரெட் அட்டையில் கணக்கெழுதி
அரிசியும் எதோ ஒரு மரக்காயும்
வாங்கி வந்து
சோறாக்கும் வரை..
பிள்ளைகள்
பக்கத்து கல்யாண மண்டபத்து
பாட்டு கேட்டு ஆடிக்கொள்வார்கள்
பசி மறந்து,
வயிற்றுக்கு உணவில்லாத போது
சிறிது செவிக்கு தரமுடியாமல்
காதடைத்து
%d bloggers like this: