Skip to content

Date archive for: September 2015

தியாகம்

மின்சார ரயிலில்
கூட்டம் குறைந்த
ஒரு ஞாயிற்றுக்கிழமை
பிற்பகலில்..
“தவறியே வானம்
மண்ணில் விழுவதில்லையே”
என தாளம் போட்டு,
ஒன்றிப் பாடிய
கண்ணில்லாத பாடகர்
ஒரு படகின் மேல்
பெரிய காலர் சட்டையும்
காற்று கலைந்த தலையுமாக
என்னுள் கிடந்த
சிவாஜி கணேசனின் பிம்பத்தை
தனதாக்கிக் கொண்டார்,
அடுத்த பெட்டியில்
அடுத்த நடிகரின்
பிம்பத்தை மாற்றத்
தயாரானார் வேறொரு
பாடலுடன்.

 

யாத்ரீகன் க்ருப்யான்

பைகள் அடுக்குவதோ,
டிக்கெட் சரி பார்ப்பதோ,
கீழ் அடுக்கு படுக்கை தகறாரோ,
வேடிக்கை பார்ப்பதோ
என்று எப்படியோ போய் விடும்
பயணிப்பவருக்கு..
கையசைக்கும் குழந்தைகளின்
சத்தமும்,
சில பெண்களின் கண்ணீரும்
ஓடி வந்து வண்டியைத்
தவற விட்டவரும்,
கொடுக்க மறந்த
தண்ணீர் பாட்டிலும்
கொண்ட நீண்ட
நடைமேடையைக்
கடக்கும் பெரும் பொறுப்பு
தனியே திரும்பும்
வழியனுப்பியவருக்கு.

 

அபராதம்

பிரபஞ்ச ரகசியம்
வெற்றிக்கான வழிகள்
பிரம்ம சூத்திரம்
எல்லா புத்தகங்களையும்
திருப்பிக் குடுத்துவிட்டு
12 ரூபாய் அபராதம்
கட்ட காசில்லையென
நூலகரிடம் சொல்லி
வைத்தான்
வேலை இல்லாத
குமார்.

சுற்றியே

உன்னைச் சுற்றியே
என் ஞாபகங்கள்
சுற்றி சுற்றி
வட்டப் பாதையில்
வளர்ந்த
தொட்டிச்செடியின்
வேர்கள் போலவே.
%d bloggers like this: