Skip to content

Date archive for: September 2015

மை

உன் விரல் என் விரல்
முதல் வருடல்
உன் மை என் இதழ்
‘வாய்’மை
உன் இதழ் என் இதழ்
வட்ட முத்தம்
நம் மெய் நம் உயிர்
பூத்தது
புது உயிர்மை.

கருஞ்சிவப்புக் குமிழ்

பிளேடால் அறுத்து
முதல் கருஞ்சிவப்புக் குமிழ்
பார்த்திருக்கிறான்
பேனாக் கத்தியால் கீறி
சட்தையில் ரத்தம் பரப்பியிருக்கிறான்
விலா விளிம்பு வரை கத்தி
சொருகி கொப்பளிக்கும்
ரத்தம் பார்த்திருக்கிறான்
தலையை மோதி சுவரை
கருஞ்சிவப்பாக்கியிருக்கிறான்
அப்பேர்ப்பட்ட குமார்
ஆளில்லாத சாலையில்
வெட்டுப்பட்டுக் கிடந்தான்
அவனருகே அவன் கூடவே
பயணித்த அதே கருஞ்சிவப்பு
ரத்தம் உறைந்தபடி.

பழுப்பு

முன்னும் பின்னுமாக
படபடத்து,
பூ விட்டு பூ தாவி
பறந்துகொண்டிருந்தது
ஒரு பட்டாம்பூச்சி.
அது புழுவாக இருந்தபோது
முடியோடு தன் மேல் ஊர்ந்து
தன்னைக் காதலோடுக் கடித்த
கணங்களை எண்ணி
தகித்ததால்
கொஞ்சம் கொஞ்சமாக
பழுப்பு நிறமாக
மாறிக்கொண்டிருந்ததது
ஒரு பச்சை இலை

சில

கோவில் பூஜையில்
அரிசி மேல் படுத்தபடி சில
முதுகில் பெயர் பொறிக்க
கடற்கரையருகே
காத்திருந்தபடி சில
ஒரு பெரிய தெய்வத்தின்
பின்னாடி ஏழாவது அல்லது
எட்டாவது கையில் சில
பித்தளைப் பூண் போட்டு
இரவில் உலா வரும்
பண்டாரத்தின் கையில் சில
மாற்று மருத்துவத்தில்
பொடிக்கப்பட்டு மருந்தாகும் சில
தான் இறந்திருந்தாலும்,
பாலூட்டி
படுத்துறங்கும் குழந்தையருகே
மீதிப்பாலோடு கவிழ்ந்தபடி
வெகு சில..
சங்குகள்.

%d bloggers like this: