Skip to content

ஓடும் ரயிலில்

ஓடும் ரயிலின்
உள்ளே ஒரு
வயர் கூடை ஓரத்தில்
பட்டாம்பூச்சி
அமர்ந்திருந்தது,
தான் கடக்கும்
மைல்கள் தெரியாமல்.

பூதக்கண்ணாடி

தொடர்ந்தெரியும் சூரியனுக்கு
பூதக்கண்ணாடி வைத்து ஆடிய
சிறுமியைப் பிடித்துப்போனது
கண்ணாடியின் வழியே
தன் பேரொளி  சுருக்கி
சின்ன வெள்ளைப் பொட்டாகி
ஒற்றை ஒளியாகி, தன்
நூற்றாண்டு காலப் பழக்கத்தில்
கீழே கிடந்த காகிதத்தை
எரித்த து
பின்னர் பெய்த
பெருமழையில்
கீழே கிடந்த
பூதக்கண்ணாடியில்
தேங்கியிருந்தது
தன்னைச் சுருக்காத
மழை நீர் !

ஒளிப் பின்தொடர்தல்

ஏரிக்கரை வயல் அருகே
ஐந்து பக்கமும் பிரகாசிக்கும்
புது மின்னொளிக் கம்பம்
வைத்த
முதல் நாள் இரவில்
தன் ஒளி மங்கிய
வருத்தத்தில் மின்மினிப்பூச்சிகளும்
தலை திருப்பி
ஒளிப் பின்தொடர்தல்
குழப்பத்தில்
சூரியகாந்திப் பூக்களும்.

 

நிழல் ஓவியம்

பச்சை வயல் நடுவே
கருப்பாய் ஒரு
நிலை ஓவியம்
பனைமரத்தின் நிழலால்
நகரும் ஓவியம்
பருந்தின் நிழலால்
%d bloggers like this: